یانەیا ئە سی میلان یا ئیتالی

 

یانا ئە سی میلان :

کومەڵا میلانا سنوردار یا تەپا پێی (ب ئیتالی: Associazione Calcio Milan SpA)، و گەلەک جاران ب کورتکرن ب ناڤێ ئەی سی میلان (ب ئنگلیزی: A.C. Milan) یان بتنێ میلان دهێتە نیاسین، یانەیەکا تەپا پێی یا ئیتالی یا پرۆفیشناڵە، ل رێکەفتی ١٦ کانوونا ئێکێ ١٨٩٩ ل باژێرێ میلانۆ ل هەرێما لۆمباردیا ل ئیتالیا، لسەر دەستێ ئنگلیز هێربەرت کیلپن هاتیە دامەزراندن. تیم ب رەنگێن خۆ یێن رەش و سۆر دهێتە نیاسین، و ل ئیتالیا ب نازناڤێ "رۆسۆنێری" (ب ئیتالی: Rossoneri) (ب کوردی: سۆر و رەش) بناڤ و دەنگە. و تیم نها د خولا ئیتالی دا یاریێ دکەت.

ئاهەنگا برنا خولا پالەوانێن ئەوروپا سالا 2002

یانەیا ئەی سی میلان یاریێن خۆ یێن فەرمی لسەر یاریگەها سان سیرۆ (ب ئیتالی: San Siro) دکەت، کو ئەو یاریگەها سەرەکی یا تەپا پێی یە ل باژێرێ میلانۆ یێ ئیتالی، و ئێک ژ جوانترین یاریگەهێن جیهانێ و پترین جهێ هەلگرتنا جەماوەری دهێتە هژمارتن کو شیانێن وێ دگەهنە ٨٠,٠٧٤ تەماشەڤانان. یاریگەه لسەر ناڤێ ئەفسانەیێ تەپا ئیتالی جوزێپێ مەیاتزا هاتیە ناڤکرن ئەوێ بەرێ یاری بۆ هەردوو یانەیێن باژێرێ میلانۆ کرین. یانەیا ئنتر میلان دوژمنێ سەرسەخت و رەقیبێ کەڤنارێ یانەیا ئەی سی میلانە، و ناڤدارترین دێربی ل جیهانێ ب ناڤێ دێربیا میلانۆ (هەروەسا دبێژنێ دێربی دێلا مادۆنینا و دێربیا تووڕەییێ) وان کوم دکەت، ئەڤە دێربیەکا تایبەتە دناڤبەرا دوو تیمان دا کو پێکڤە ١٠ نازناڤێن خولا یانەیێن پاڵەوانێن ئەورۆپا، و ٣٩ نازناڤێن خولا ناڤخۆیی بدەستڤە ئیناینە. ئێکەم هەڤدیتن دناڤبەرا هەردوو تیمان دا ل رێکەفتی ١٨ تشرینا ئێکێ ١٩٠٨ هاتەکرن، و ب سەرکەفتنا ئەی سی میلان ب ئەنجامێ ٢-١ ب دوماهیک هات.

ئەی سی میلان ئێک ژ سەرکەفتیترین یانەیێن جیهانێ دهێتە هژمارتن، کو ١٨ نازناڤ لسەر ئاستێ کیشوەرێ ئەورۆپا و لسەر ئاستێ جیهانێ بدەستڤە ئیناینە و دگەل بۆکا جونیۆرز یەکسانە، کو میلان ٧ جاران نازناڤێ خولا یانەیێن پاڵەوانێن ئەورۆپا بدەستڤە ئینایە، و پشتی ریال مەدرید ب پازدە نازناڤان دهێت، و نازناڤێ جامی جیهانی یێ یانەیان، یان وەک بەرێ دهاتە ناڤکرن "جامێ ئنترکۆنتینێنتال" ٤ جاران بدەستڤە ئینایە، و نازناڤێ جاما سوپەرا ئەورۆپی ٥ جاران بدەستڤە ئینایە، و دوو جاران ژی نازناڤێ جاما جامێن ئەورۆپی بدەستڤە ئینایە و ب ڤی رەنگی کوما گشتی یا نازناڤێن وێ یێن کیشوەری دبنە ١٨ و چوارەم پترین یانەیە کو نازناڤێن کیشوەری بدەستڤە ئیناین. ل دۆر رێزبەندیا ئەورۆپی، رێزا پەنجی و چوارێ لسەر ئاستێ تیمێن ئەورۆپی دگریت، لدیڤ رێزبەندیا ئێکەتیا تەپا پێی یا ئەورۆپی، ب پشت بەستن لسەر وان ئەنجامێن د پێشبڕکێیێن ئەورۆپی دا د پێنچ سالێن دوماهیێ دا بدەستڤە ئیناین.

پێکهاتێ ئێکێ کو ناسناڤ بو ئەی سی میلان بری

ل ناڤخۆیا ئیتالیا، میلان پشتی یوڤێنتوس دهێت ژ لایێ ژمارا نازناڤان ڤە، کو شیاینە ١٩ جاران نازناڤێ خولا ئیتالی بدەستڤە بینن. هەروەسا تیمێ پێنج جاران جاما ئیتالیا و هەشت جاران جاما سوپەرا ئیتالی بدەستڤە ئینایە. دگەل ڤێ چەندێ، ئەی سی میلان داکەتیە خولا پلا دوو (serie B)، جارا ئێکێ ل سالا ١٩٨٠ ب فەرمانا دادگەهێ لسەر ئاریشا گزی کرنا د ئەنجامێن یاریان دا - کو ناڤێ "تۆتۆنێرۆ" لێ کربوون - و جارا دووێ لسەر یاریگەهێ ل سالا ١٩٨٢. ئەی سی میلان ئێکانه تیم بوو کو شیای رێزێن ئێکێ و دووێ و سیێ د پێشبڕکێیا بدەستڤە ئینانا خەلاتێ تۆپا زێرین دا بگریت ل سالێن ١٩٨٨ و ١٩٨٩، و پاڵەوانێ ڤێ پێشبڕکێیێ مارکۆ ڤان باستن بوو، بەری کو تیما بەرشەلۆنا بشێت هەمان دەستکەفتی ل سالا ٢٠١٠ بدەستڤە بینیت. ئەی سی میلان پترین جەماوەر د ناڤ یانەیێن ئیتالی دا هەیە و ل ئەورۆپا یا پێنجێ یە لدیڤ ڤەکۆلینەکا رۆژناما لا ریپوبلیکا یا ئیتالی ل هەیڤا تەباخا سالا ٢٠٠٧ ئەنجام دای.

یاریزانێ بەرازیلی کافو

ژ لایەکێ دی ڤە، ئەی سی میلان ئەندامەکێ دامەزرێنەرە د کومەلا جی-١٤ یا یانەیێن پێشەنگێن ئەورۆپی دا، کو نها هاتیە هەلوەشاندن و کومەڵا یانەیێن ئەورۆپی جهێ وێ گرتیە. لدیڤ راپۆرتا کۆڤارا فۆربس یا بناڤ و دەنگ ب ناڤێ لیستا فۆربس بۆ دەولەمەندترین یانەیێن تەپا پێی ل جیهانێ، ئەی سی میلان دوازدەمین دەولەمەندترین یانەیا تەپا پێی یە ژ لایێ بهایێ بازاری ڤە، و ل ئیتالیا یا دووێ یە، کو بهایێ وێ یێ بازاری ل سالا ٢٠١٧ گەهشتە ٨٢٥ ملیۆن دۆلارێن ئەمریکی. هەروەسا ئەی سی میلان رێزا سیانزدێ د لیستا بهاترین ٢٠ مارکەیێن تەپا پێی دا دگریت یا کو ژ تۆرا براند فاینانس دەرکەفتی ب بهایێ ٢٩٢ ملیۆن یۆرۆ، هەروەسا ئەی سی میلان رێزا شازدێ گرتیە ژ لایێ داهاتی ڤە د ئامارا سالانە یا بناڤ و دەنگ ب ناڤێ لیستا دەولەمەندترین یانەیێن تەپا پێی ل جیهانێ کو کومپانیا دیلۆیت توش تۆماتسۆ بەلاڤ دکەت، پشتی کو بهایێ داهاتێ وێ گەهشتیە ٢١٤.٧ ملیۆن یۆرۆ بۆ وەرزێ ٢٠١٦-٢٠١٧.

پۆستێ سەرۆکێ یانەیێ ژ ٨ گولانا ٢٠٠٨ ڤە ڤالا مابوو، پشتی کو سیلڤیۆ بێرلوسکۆنی دەست ژ کار کێشای دا کو ببیتە سەرۆکێ حکومەتا ئیتالی، و جێگرێ سەرۆکێ جڤاتا کارگێری و سەرۆکێ جێبەجێکارێ یانەیێ یێ ئیتالی ئادریانۆ گالیانی جهێ وی گرت. لێ ل سالا ٢٠١٣ پشتی دەرکەفتنا سیلڤیۆ بێرلوسکۆنی ژ حکومەتا ئیتالی، ئادریانۆ گالیانی جارەکا دی زڤریەڤە سەرۆکاتیا یانەیێ. یانەیا ئەی سی میلان بوویە کومپانیەک د ناڤ کومەکا کومپانیێن سەر ب کومەلا فینینڤێست یا وەبەرهێنانێ ڤە ژ سالا ١٩٨٦ پشتی کو بازرگان سیلڤیۆ بێرلوسکۆنی یانە ل ئادارا ١٩٨٦ پشتی روودانێن ئاریشا تۆتۆنێرۆ کری. و ل ١٣ نیسانا سالا ٢٠١٧، پتریا پشکێن ناڤێ یانەیێ (٩٩.٩٣%) ب بهایەکێ پتر ژ ٩٦٠ ملیۆن یۆرۆ هاتنە فرۆتن ب رۆسۆنێری سپۆرت بۆ وەبەرهێنانێ، کو کومپانیەکا وەبەرهێنانێ یە و ملیاردێرێ چینی لی یۆنگ هۆنگ برێڤە دبەت، لێ ل تەمموزا سالا ٢٠١٨، چینی لی یۆنگ هۆنگ نەشیا دەیێن خۆ یێن ب بهایێ ٤١٥ ملیۆن یۆرۆ د دەمێ دیارکری دا بدەتە ئێلیۆت، و ئەڤە بوو ئەگەر کو کومپانیا "ئێلیۆت ماندجمێنت" یا وەبەرهێنانێ یا ئەمریکی پرۆسەیا دەستبسەرداگرتنا راستەقینە یا یانەیێ ئەنجام بدەت، و ب ڤی رەنگی بوونە خودانێن فەرمی یێن یانەیێ.

پاولو مالدینی کاپتنێ بەرێ یێ یانا ئەی سی میلان

مێژوویا یانەیێ

بابەتێ سەرەکی: مێژوویا ئەی سی میلان

«ئەم دێ ببینە تیمەکا شەیتانان. رەنگێن مە سۆر و رەشن، و ئاگر و ترسا کو رەقیبان دترسینن نیشان ددەن!» — هێربەرت کیلپن

دامەزراندنا یانێ :

یانەیا ئەی سی میلان ل ڕێکەفتی ١٦ کانوونا ئێکێ یا سالا ١٨٩٩ ژلایێ سێ ئنگلیزان ڤە هاتە دامەزراندن، ئەو ژی: هێربەرت کیلپن، ئەلفرێد ئێدواردز، و دەیڤد ئەلیسن، کو وان ل سەر دامەزراندنا تیمەکا تەپاپێیێ ڕێککەفتبوون. ل دەستپێکێ ناڤێ یانەیێ «یانەیا میلان یا کریکێت و تەپاپێیێ» بوو. پشتی بۆرینا هەیڤەکێ ب سەر دامەزراندنا تیمێ دا و هەلبژارتنا دەیڤد ئەلیسن وەک ئێکەم کاپتن د دیرۆکا تیمێ دا، یانە ل ١٥ کانوونا دویێ یا سالا ١٩٠٠ چوو د ناڤ ئێکەتییا ئیتالی یا تەپاپێیێ دا. ئێکەم یارییا یانەیا ئەی سی میلان دژی یانەیا مێدیۆلانوم بوو، کو ئێک ژ تیمێن باژێرێ میلانۆ بوو، و ئەڤە ل ڕێکەفتی ١١ ئادارا ١٩٠٠ بوو، و ب ئەنجامێ ٣-٠ ب قازانجا میلان ب دوماهی هات، پشتی کو دەیڤد ئەلیسن ئێکەم گۆل د یاریێ دا و ئێکەم گۆل د دیرۆکا ئەی سی میلان دا تۆمارکری.

ل ١٥ نیسانا ١٩٠٠، ئەی سی میلان ئێکەم یارییا خۆ یا فەرمی دژی یانەیا ئێف سی تۆرینێزی د خولا ئیتالی دا کر، و ب ئەنجامێ ٠-٣ دۆڕاند، و ژ وێ قەهرەمانییێ دەرکەفت. ڤێ ئەنجامێ کارتێکرن ل سەر هیڤی و هێزا تیمێ نەکربوو، هەرچەندە یانەیا ئێف سی تۆرینێزی د وی دەمی دا ئێک ژ بهێزترین تیمان دهاتە هژمارتن. ئەڤ دۆڕاندنە بوو پالپشتەک بۆ یانەیا ئەی سی میلان دا کو سوپرایزەکا مەزن د وەرزێ ل دویڤ دا چێکەت، و شیا قەهرەمانییا خولا ئیتالی ب دەستڤە بینیت پشتی کو د یارییا دوماهیێ دا ب سەر یانەیا جەنەوا یا هەلگرا نازناڤی و زال ب سەر قەهرەمانییێ دا ب ئەنجامێ ٣-٠ سەرکەفت، ب گۆلێن هێربەرت کیلپن و دو گۆلێن نێگرێتی.

ژورا ناسناڤێن ئەی سی میلان

د وەرزێ سالا ١٩٠٥ دا ناڤێ یانەیێ بۆ «یانەیا میلان یا تەپاپێیێ» هاتە گوهۆڕین، و گرنگییا یانەیێ ب تەمامی ل سەر یاریکرنا تەپێ بوو. د وەرزێ سالا ١٩٠٦ دا یانەیا میلان دگەل یانەیا یوڤێنتوس د خالان دا وەکهەڤ بوون، لەوا یارییەکا ئێکلاکەر ل باژێرێ تۆرینۆ بۆ دیارکرنا قەهرەمانی هاتەکرن، و ب وەکهەڤییا بێ گۆل ب دوماهی هات. د یارییا ڤەگەرێ دا ل میلانۆ، میلان شیا ب دو گۆلان بەرامبەر بێ بەرامبەر بسەرکەڤیت و بۆ جارا دویێ د دیرۆکا خۆ دا نازناڤێ خولا ئیتالی ب دەستڤە بینیت. یانەیێ ل سەر سەرکەفتنێن خۆ پشتی وی دەمی بەردەوام بوو، و ل سالا ١٩٠٧ پارێزگاری ل نازناڤێ خولا ئیتالی کر، پشتی کو ب سەر هەردوو تیمێن تۆرینۆ و ئەندریا دا سەرکەفتی.

جودابوون

ئەگەرێ جودابوونێ د یانەیا میلان یا تەپاپێیێ دا، نەرازیبوونا هندەکان بوو ل سەر پشکدارییا یاریزانێن بیانی دگەل یانەیان. د وەرزێ ١٩٠٨ دا گەلەک یانەیێن ئیتالی دژی ڤی تشتی ڕاوەستیان، لەوا ئێکەتییا ئیتالی یا تەپاپێیێ بریار دا کو پشکدارییا یاریزانێن بیانی د خولێ دا قەدەغە بکەت، و ئەڤە بوو ئەگەر کو هندەک یانەیێن ناڤدار وەکی تۆرینۆ، جەنەوا و میلان خولێ بایکۆت بکەن. لێ هندەک ژ کارگێرێن میلان دگەل وێ بۆچوونێ بوون کو یاریزانێن بیانی ژ یاریکرنێ د خولێ دا بهێنە قەدەغەکرن، لەوا کومەک ژ یانەیێ جودا بوو و یانەیەک دامەزراند و ناڤێ وێ کر «ئینتەر میلان». ئێکەم هەڤدیتن د ناڤبەرا هەردوو تیمان دا ل ١٨ تشرینا ئێکێ یا سالا ١٩٠٨ بوو، و ب سەرکەفتنا ئەی سی میلان ب ئەنجامێ ٢-١ ب دوماهی هات.

وێنەیێ یاریگەها جوزێپ مەیاتزا

یاریگەها جوزێپ مەیاتزا یان سان سیرو :

یاریگەها جوزێپێ مەیاتزا یان ژی "سان سیرۆ"، وەکی حەزژێکەرێن یانا ئەی سی میلان دبێژنێ، یاریگەها سەرەکی یا باژێرێ میلانۆ یێ ئیتالیایە و هەردوو یانێن مەزن یێن باژێری ل سەر یاریدکەن: ئینتەر میلان و ئەی سی میلان. و ب ئێک ژ جوانترین یاریگەهێن جیهانێ و خودان مەزنترین شیان بۆ ڤەگرتنا جەماوەری دهێتە هژمارتن، چونکی شیانێن وێ دگەهنە ٨٠،٠٧٤ تەماشەڤانان. یاریگەهـ ب ناڤێ ئەفسانەیێ تەپاپێیێ ئیتالی جوزێپێ مەیاتزا هاتیە ناڤکرن، ئەوێ بۆ هەردوو یانان یاریکری. ئاڤاکرنا یاریگەهێ ل سالا ١٩٢٥ دەستپێکر، و سەرۆکێ ئەی سی میلان یێ وی دەمی، "پیێرۆ پێرێلی"، تێچوویێن ئاڤاکرنێ ل ستۆیێ خۆ گرتن. یاریگەهـ ژ لایێ ئەندازیارێ تەلارسازیێ "ئولیسی ستاکینی" ڤە هاتیە دیزاینکرن و ئەندازیارێ شارستانی "ئەلبێرتۆ کوجینی" سەرپەرشتیا ئاڤاکرنێ کر. و ب سان سیرۆ هاتیە ناڤکرن ژبەر ناڤێ کەنیسەیەکا د هەمان تاخیدا، و ل سەر شێوازێ یاریگەهێن ئنگلیزی هاتیە دیزاینکرن، کو ب هەبوونا چار مدرەجێن نێزیک و بالێن سەرەکی یێن ب پەردە داپۆشی دهاتە نیاسین، و شیانێن وێ ٣٥،٠٠٠ کەس بوون. یاریگەهـ ل رۆژا ١٩ ئەیلۆنا ١٩٢٦ ب یاریەکا بهێز د ناڤبەرا هەردوو یانێن باژێریدا هاتە ڤەکرن کو ب سەرکەفتنا ئینتەر ب ئەنجامێ ٦-٣ ب دوماهیک هات. لێ هەلبژارتیێ ئیتالیا یێ تەپاپێیێ ئێکەم یاری ل رۆژا ٢٠ شوباتا ١٩٢٧ ل هەمبەر هەلبژارتیێ چیکۆسلۆڤاکیا کر و ب یەکسانبوونا ئەرێنی ٢-٢ ب دوماهیک هات. وی دەمی یاریگەهـ بتنێ یا یانا ئەی سی میلان بوو، لێ ئینتەر میلان ل یاریگەها خۆ یا کەڤن "سیڤیکا" یاریدکر.

وێنێ یاریگەها سان سیرو دناڤ دا

و ل سالا ١٩٣٥ یاریگەهـ هاتە بەرفرەهکرن دا بشێت ٥٥،٠٠٠ تەماشەڤانان بگرت، و د هەمان سالدا یاریگەهـ ب شارەوانیا میلانۆ هاتە فرۆتن. و ل سالا ١٩٤٠ دەست ب نویژەنکرنا وێ هاتە کرن دا شیانێن وێ بگەهنە ١٢٥،٠٠٠ تەماشەڤانان، ئەڤ چەندە بوو ئەگەر ببیتە مەزنترین یاریگەهـ ل جیهانێ، و نویژەنکرن ل سالا ١٩٤٧ ب دوماهیک هات. جهێ ئاماژەپێکرنێ یە کو بناڤودەنگترین یاریا وی دەمی ل وێ یاریگەهێ هاتیە کرن، یاریەکا خولا ئیتالی بوو کو هەردوو یانێن باژێرێ میلانۆ کومکرن: ئەی سی میلان و ئینتەر میلان، و ب ئەنجامێ ٦-٥ ب مفایێ ئینتەر ب دوماهیک هات. ل سالا ١٩٤٩، ئینتەر بریار دا کو پشکداریێ دگەل ئەی سی میلان د یاریگەها سان سیرۆ دا بکەت، ئەڤە ژی بەری کو قاطەکا دویێ ل مدرەجان ل سالا ١٩٥٥ بهێتە ئاڤاکرن، کو شیانێن یاریگەهێ بۆ ٩٠،٠٠٠ تەماشەڤانان کێمکرن، و ب ڤێ چەندێ بوو ئێک ژ مەزنترین یاریگەهێن ئەوروپا. ل سالا ١٩٧٩ ئەنجومەنێ شارەوانیا میلانۆ ب رەزامەندیا ئینتەر و ئەی سی میلان بریار دا ناڤێ یاریگەهێ بگوهۆڕن بۆ "جوزێپێ مەیاتزا"، ئەفسانەیێ ئیتالی و سیمبولێ یانا ئینتەر د سالێن سیهان و چلاندا، ئەوێ د دوماهیک وەرزێن خۆ دا چۆیە میلان و پاشی زڤریەڤە ئینتەر.

پشتەڤانێت ئولتراسا ئەی سی میلان

لێ سەرەرای ڤێ چەندێ، هێشتا جەماوەرێ میلان ناڤێ سان سیرۆ ل یاریگەهێ دکەن، ژبەرکو "جوزێپێ مەیاتزا" پتر پشکداری د یاریێن ئینتەر دا کریە و ب ئێک ژ سیمبولێن وێ دهێتە هژمارتن. و بەری سالا ١٩٩٠، دەمێ ئیتالیا مێهڤانداریا یاریێن دوماهیێ یێن جامی جیهانی یا ١٩٩٠ کری، یاریگەهـ ب زێدەکرنا قاطەکا سیێ بۆ جەماوەری هاتە نویژەنکرن، هەروەسا هندەک گوهۆڕین د سەقف و لایەناندا هاتنە کرن دا شیانێن یاریگەهێ بگەهنە نێزیکی ٨٥،٥٠٠ کەسان و ب ڤێ چەندێ ببیتە شاکارەکێ تەلارسازیێ کو هەرتم جەماوەرێ یانێن میلانۆ شانازیێ پێ دبەن.

ناڤەندە میلانێللۆ :

گوتارا سەرەکی: ناڤەندا میلانێللۆ یا وەرزشی

ناڤەندا میلانێللۆ یا وەرزشی (ب ئیتالی: Centro Sportivo Milanello) ل سالا ١٩٦١ هاتیە دامەزراندن و ناڤەندا راهێنانێن یانا ئەی سی میلان یا ئیتالیایە، نها ب باشترین ناڤەندا راهێنانێن تەپاپێیێ ل جیهانێ دهێتە هژمارتن ژبەر ئەو ئامادەکاریێن تەکنیکی و پزیشکی یێن ئاست بلند تێدا، کو وێ دکەتە جهێ سەرەدانا گەلەک تیپێن ئیتالی و ئەوروپی و ب تایبەتی ژی هەلبژارتیێ ئیتالیا. خودانێ بیرۆکا دامەزراندنا میلانێللۆ سەرۆک "ئەندریا ریزۆلی" بوو ل سالا ١٩٦١. کارێن ئاڤاکرنا میلانێللۆ دوو سالێن تەمام ڤەکێشان و ل سالا ١٩٦٣ هاتە ڤەکرن. و پشتی ملیاردێرێ ئیتالی "سیلڤیۆ بێرلوسکۆنی" ل سالا ١٩٨٦ بوویە سەرۆکێ یانێ، گرنگیەکا مەزن دا میلانێللۆ، دا کەشەکێ گونجای بۆ ستێر و راهێنەرێن تیمێ دابین بکەت.

میلانێللۆ دکەڤیتە سەر گرەکێ کو بلنداهیا وێ ٣٠٠ مەتران ژ ئاستێ روویێ دەریایێ بلندە و ٥٠ کیلۆمەتران ژ باژێرێ میلانۆ دویرە، و دکەڤیتە نێزیک گوندێ "ڤێراسی"، و دشێت ب ساناهی ب رێکا رێیا بلەز بگەهیێ. قەفەس ئێک ژ یاریگەهێن میلانێللۆ یە و قەبارێ وێ بچووکە لێ ب هەبوونا دیوارەکێ ل دەوروبەرێن وێ ب بلنداهیا ٢.٣ مەتران و ل سەر وێ ژی سیاجەک ب بلنداهیا ٢.٥ مەتران دهێتە نیاسین، و تایبەتمەندیا وێ یاریگەهێ ئەوە کو تۆپ قەت تێدا ناوەستیت، ئەڤە ژی ب مەرەما زێدەکرنا لەزاتیا یاریزانان و لەزاتیا وان د بریاردانێدا.

ئاڤاهیێ ئیداریا ئەی سی میلان

ژ لایێ شیانانڤە، میلانێللۆ رێکەکا ١٢٠٠ مەتری تێدایە کو د ناڤبەرا داراندا دبۆریت، و بۆ راهێنانێن بازدانێ و لێخوڕینا پایسکلان هاتیە تەرخانکرن ب مەرەما چارەسەرکرنا یاریزانێن پێکراوی و بلندکرنا ئاستێ شیانێن لەشی. هەروەسا تاقیگەها میلان بۆ پیڤانێن لەشی بخۆڤە دگریت و ئێکەم تاقیگەهـ ل جیهانێ دهێتە هژمارتن د بیاڤێ پیڤانا رێژەیێن شیانێن لەشی یێن یاریزانان و پیڤانێن دی د جیهانا تەپاپێیێدا، دا کو راهێنەر بشێت ب شێوەیەکێ دیارکری بزانیت کەنگی یاریزانێ پێکراوی دشێت بزڤریت، و دێ هێزا لێدانا وی چەند بیت. و تاقیگەهـ نموونەیان ژ یاریزانێن یانەیێن جودا یێن ئەوروپی وەردگریت.

رێباز فیصل